Менә көтеп алган җәйләребез дә үтеп бара, бу җәйдә һәркемнең дә истә калырлык, ел буе сагынырлык мизгелләре булгандыр, дип ышанабыз.
Мәдрәсә лагеренә йөргән кызларыбыз да шундый җылы һәм матур көннәрне сагыначакбыз, дип кайтып киттеләр. Августның бишеннән ундүртенә кадәр мәдрәсәгә килеп, Ислам нигезләрен, намазлар, догалар һәм сүрәләр, пәйгамбәрләр тарихын өйрәнделәр кызлар. Тукай паркына экскурсияга да бардылар, төрле уйыннар уйнадылар.
“Бу елны без кызларны ике төркемгә бүлеп эшләдек: Коръән укучылар һәм гарәп әлифбасының хәрефләрен өйрәнүчеләр төркеме. Безнең бүлүгә карамастан, балалар гел бергә уйнадылар, олы кызлар бәләкәйләрне үзләренә ияртеп, тәрбияләп йөрделәр, һичнинди тәкәбберләнү, бер-берсен рәнҗетү булмады, Аллаһка шөкер”.
Әлеге күңелле мизгелләр балаларның исләрендә озак саклансын һәм алган файдалы гыйлемнәре киләчәк тормышларында уңышларга ирешергә сәбәп булсын, дигән теләктә калабыз.
|