Икенче май иртәсендә, Тукай авылында  соңгы елларда  моңа тиңе булмаган зур фаҗига булды. Авылыбыздагы Нияз һәм Гөлназ Камалдиновлар  йорты, электр чыбыгыннан чыккан янгыннан  бөтенләй янып китте.  Авылыбызның бер кешесе дә моңа битараф калалмады: янгын вакытында ук  бар авыл  халкы берләшеп, утны сүндерергә,  аңа җәелеп китәргә ирек бирмичә, бар көчен куйды.  Тик көчле җил булу сәбәпле йортны саклап калып булмады, яшь гаилә  яшәр урынсыз калды.

   Әмма, авыл халкының бердәмлегенә шаккатырлык булды.  Шул ук кичне авылдашларыбыз  бар ярдәмен фаҗигагә очраган  гаиләгә юнәлтте.  Кем акчалата, кем кием салым белән,  кем кул көче белән ярдәм итте. Авылыбызнең мәхәлләсе дә зур ярдәм күрсәтте. Хәттә бу кайгыдан күрше авылдагы кардәшләребез дә читтә калмады, алар да үзләренең ярдәмен күрсәттеләр. Нәтиҗәдә,  янган йортның  кирпеч стеналары икенче көнне үк сүтелде,  халык тырышлыгы белән 4-нче май көнне яңа  стеналар өелде. Бүген инде йортның түбәсен ябу эшләре бара. Фаҗига булганга бер атна да үтмәде, ә йорт хуҗалары яңа өйле булып килә. 

   Тукай авылы халкының  бердәмлеге, бер-беренә ярдәм итүе, бәла-каза килгәндә  аеруча  нык күренде.

   Фаҗига  булган йортның хуҗалары Нияз һәм Гөлназ, аларның туганнары бәла-казаны бар авыл белән бердәм күтәреп, тиңе булмаган олы ярдәм күрсәткәннәре, тиз арада яңа йортлы итеп килгәннәре өчен, барлык авыл халкына, олысы-кечесенә, карты-яшенә  йөрәктән чыккан  рәхмәтләрен җиткерә. Аллаһ Тәгалә гайләләрегезгә тынычлык, тәннәрегезгә шифа, күңелләрегезгә җан тынычлыгы  бирсен. Раббыбыз җөмләбезгә дә исәнлек-саулык, тәүфикъ, хәерле озын гомер, хәләл ризык һәм хәләл мал бирсен. Кылган хәерле гамәлләрегезне Аллаһ кабул әйләсен. Авылыбызда, йортларыбызда һәрвакыт Аллаһының нуры, рәхмәте һәм бәрәкәте булсын.

  Алар,  бу рәхмәт сүзләрен сайтыбыз аша да җиткерүне сорады. 

  Аллаһының рәхмәте яусын авылдашлар, гел шулай бердәм  һәм нык булыйк.